السلام عليكم ورحمة الله وبركاته

كلنا يعرف أهمية التبريد في الكومبيوتر وأهمية نزول الحرارة لأقل قيمة ممكنة والتي (أي الحرارة) تؤثر سلباً علي الأداء وعلي مصنعية القطع الإلكترونية الموجودة لديك
ويتم قياس الحرارة بطريقتين إما عن طريق البيوس وإما عن طريق البرامج منها البرنامج البسيط المميز جداً HWMONITOR

طبعاً البرنامج يحتوي علي تفاصيل جميلة جداً وواضحة من الصورة حرارة البروسيسور حرارة الهارد حرارة كارت الشاشة والفولتات المتولدة من الباورسبلاي .. وحاجات كتير
حمل من هنا

ندخل بئي في المهم أنا عندي جهازي علي قدي ياعم بس حرارته عالية أوي وكمان مقدرش أجيب تبريد مائي ولا الحاجات الغالية دي .. اممممم
وزي مابيقولوا الحاجة أم الإختراع فلازم الواحد يفكر في حلول بديلة ولو بأقل كفاءة

كنت جالس أسوي اختبار علي أداء كارت الشاشة وحرارته والذي منه ولاقيت حرارته 74 سليزيس وكمان ده في بداية الضغط عليه يعني الوضع ماكنش استمر وقت أكبر من كدة يعني لو قلنا هضغط علي الكارت نص ساعة الحرارة هتبقي 80 علي أقل تقدير ده غير إن المسافة مابين كارت الشاشة وكارت جمب منه صغيرة جداً وبالتالي الهواء مكتووووووم ....!
اوووبس طيب نعمل اية ؟
حط ايديك في جيبك (عشرة جنية بالعدد) طيب ياجدعان مقدرش أسيب الوضع كدة لأن نهاية هتبقي مش في صالحي بتاتاً وبدل ما مثلاً هدفع دلوقتي 100 جنية هدفع بعد كدة خمس أضعاف الرقم ده عشان أعوض بئي اللي ممكن يحصل ... !!

أكيد فيه حل بس غير متاح حالياً في الذاكرة .. هنفتح كدة الهارد يمكن لما نقلب نلاقي حاجة موجودة هناك وبالفعل لاقينا إننا
ممكن نصنع شئ بسيط يقوم بالمهمة المطلوبة بشكل مؤقت (وحط تحتها خط دي وخطين كمان) اية يعني لما نعملنا مروحة

احنا عندنا أحد أذرع الباور 4 طرف واحد 12 فولت وواحد تاني 5 فولت واتنين أرضي
ناخد صورة كدة عشان نفهم الدنيا ماشية ازاي

هذه الصورة مصغرة إضغط هنا لعرضها بحجمها الطبيعي .

الأصفر = 12 فولت
الأحمر = 5 فولت
الأسود = أرضي

طيب ندور كدة علي مروحة مستعملة ولا حاجة .. امسسسسسسك عندك مروحة قديمة بتاعت بروسيسور

بس انا عايز مروحة بس مش كمان مشتت حراري (HEATSINK)
مافيش مشكلة خالص فيه كلبسات علي طرف المروحة متصلة بالمشتت الحراري وماسكة فيه ودي بتتفك من غير أي مشاكل فكها بحيث تبقي المروحة لوحدها والمشتت لوحده

هذه الصورة مصغرة إضغط هنا لعرضها بحجمها الطبيعي .

أيوة المروحة دي غير دي بس أنا عايز أوصل للشكل العام من الموضوع هتلاقي مكتوب علي مروحة الإنتل (ودي كانت محل تجربتي) 12 فولت 0.4 ملي أمبير علي ما أتذكر
طيب جميل جداً
بس فيه مشكلة ياريس !
ايـــــــة بس ؟
المروحة 4 طرف أصفر وأزرق وأسود وأخضر (اية الجنينة اللي احنا فيها دي)
طيب بص ياسيدي المروحة (بتاعت البروسيسور تحديداً) 4 طرف واحد للفولتيه وهوا الأصفر وواحد أرضي وتنين تانيين للسرعة لإنها بتشتغل سمارت (شغلانة كدة مش موضوعنا دلوقتي) المهم احنا هنشغلها من غير سمارت تبقي بأقصي جهد وأقوي سرعة متاحة
طيب تمام .. اية علاقة المروحة دي بئي بكابل الباور مهو دي ليها فتحه ودي ليها فتحة تانية والماذربورد (مش كله يعني) مافيهاش غير فتحة مروحة واحدة لمروحة بروسيسور واحدة ؟
مافيش مشكلة ياسيدي شايف انتا الكابل ده

آآآآآه ده اللي مبيكونش عنده باور للساتا بياخد من كابل الباور العادي ويقلبهوله ساتا .. بس ده اية علاقته بموضوعنا برضة ؟
ده ياسيدي حل اللغز !
يعني اية ياريس ؟
يعني ده بيكون فتحته MAIL
عكس كابلات الباور سبلاي بتكون FEMAIL
يعني اية برضة ؟
يعني نقدر نحط دي في دي ونوصل الطرف التاني بالمروحة وخلص الموضوع علي كدة
يارااااااجل طيب يالا قول
(أخينا ده شكله مش فاهم حاجة)
بص ياسيدي
هنروح علي الحتة بتاعت الساتا دي ونيجي قبلها بشوية كدة ونجيب المقص ونروح قاطعين .. تمام ؟
تماموز
هنروح علي المروحة ونيجي قبل الكونيكتور بتاعها (اللي بيدخل في المذربورد) وبرضة هنجيب المقص ونروح قاطعين .. تمام ؟
تمام جداااا
دلوقتي عندنا 8 طرف مقطوعين 4 عند المروحة و4 عند الوصلة !
بس ركز جداً بئي في الخطوة دي عشان أي تهور ممكن يضيعك ويضيع مستقبل جهازك
هنوصل طرفين فقط من المروحة مع طرفين فقط من الوصلة بتاعت الساتا باور
طيب والطرفين التانيين هنعمل
فيهم اية ؟
كبر دماغك
لآ بجد يعني
هنرميهم في الزبالة ولا هيروحوا فين ؟
هيتفصلوا طبعاً لأنه لا حاجة لنا بيهم
هنعمل جدول كدة لذيذ فيه توضيح بسيط للقصة

المروحة ---------------- الوصلة
==================
الأصفر <----------------> الأصفر
الأسود <----------------> الأسود

طيب ماحنا عندنا طرفين اسود في الوصلة ؟
وصل واحدة فقط منهم مع الطرف الأخر
(يستحسن إنها تكون الطرف المجاور للطرف الأصفر)
علي العموم وصل الطرفين ببعض كويس واعزلهم عن طريق شريط لحام وافصل الطرفين التانيين خالص ويستحسن إنك تضمهم علي بعض مع الطرفين اللي هيشغلوا المروحة وتلحمهم بس ماتكترش من شريط اللحام عشان السلك ما يتقلش ويعملك مشاكل بعد كدة

طيب الحمد لله وصلنا طرفين المروحة مع طرفين الوصلة (المعدلة) للساتا ،، هنعمل اية تاني ؟
خلاص ياسيدي مافيش مشكلة خالص هات بئي الوصلة ال MAIL بتاعت الساتا المعدلة وحطها في الكابل اللي طالع من الباور سبلاي ال FEMAIL
كأنك بتركب باور لهارد ساتا تماماً أو مروحة خارجية علي باب الكيسة
والآن قم بتجربة المروحة وستعمل معك بإذن الله بشكل سليم
يفضل إنك تجرب علي باور سبلاي خارج الكيسة تماماً قبل إعتماد الشغل بحيث ما يكونش فيه مشاكل خالص تضر بالماذربورد أو بالباور سبلاي
عن نفسي قمت بالتجربة علي باور سبلاي خارجي ومن ثم نقلت المشروع علي الكيسة ولكن واجهتني
مشكلة كبيرة ألا وهي تثبيت المروحة الإضافية ولكن الحمد لله ان المسافة مابين الكرتين تسمح بدخول المروحة في المنتصف وحيث أن المروحة تعمل علي نظام دفع الهواء لأسفل فبالتالي لن يكون هناك مشاكل من تركيبها مابين الكرتين فمروحة البروسيسور تقوم بدفع الهواء إلي المشتت الحراري لتخفيف الحرارة عنه وليست كالمرواح التي تعمل علي سحب الهواء (مثل التي توجد في باب الكيسة) وبالتالي لن تؤثر علي الكارت الموجود بجوارها .. صورة لنفهم الاوضاع الحالية بعيداً عن كتر
الكلام (وعذراً علي ردائة الصورة)

هذه الصورة مصغرة إضغط هنا لعرضها بحجمها الطبيعي .

صورة عامة من الجهاز بعد التركيب

++ المنطقة الخضراء اللي في أسفل الصورة هيا منطقة القطع علي فكرة ++

يمكنك إستغلال هذه
الطريقة في وضع مروحة من النوع الساحب للهواء بين كارتين مفعل مابينهم الكروس فاير (CROSSFIRE)
أو وضع مروحة كهذه للهارد من ناحية البورده
أو تضع مروحة إضافية فوق مروحة البروسيسور (بس تثبيتها متعب شوية)

1- التكلفة الزهيدة جداً حيث يمكنك شراء مروحة باور سبلاي مستعملة بخمس جنيهات من أي مكان صيانة وكابل ساتا بثلاث جنيهات (أقل من عشرة جنية) وانتا وشطارتك برضة
2- سهولة الإعداد حيث لا تحتاج لعمليات جراحية لوضع نظام تبريد جديد
3- تبريد معقول (عن نفسي وصلت حرارة الكارت الآن لـ 45 من أصل 74 تقريباً)

**عيوب الطريقة

1- صعوبة التثبيت حيث لا يوجد لديك اماكن مجهزة لهذا الغرض ولكن تقدر تتغلب عليها لو عندك أدوات تساعدك علي هذا
2- زيادة إستهلاك الكهرباء (هيا مش كبيرة أوي بس يعتبر زادت) لو هتركب مراوح كتير خلي بالك من الوات بتاع الباور سبلي بتاعك

أتمني إنكوا تكونوا استفدتم من الفكرة .. ومنتظر أرائكم بخصوصها
ولكن أكرر التحذير لله وحتي أخلي مسؤوليتي عن أي سوء استخدام للطريقة وبالتالي تلف القطع لديك
-- وهو إنك تجرب علي باور خارجي مالم تكن مُلِم بتفاصيل الهاردوير وعامل حسابك كويس لأي طارئ --
والسلام عليكم ورحمة الله